WARKAH DARI REMBAU

Kepado YB-YB yang sey sayang….

Namo sey ni Karim… Pengundi berdaftar DUN CHEMBONG, PARLIMEN ROMBAU. Sey nulih sughat ni bukan apo… sajor yor nak ucap’an timo kasih kek YB-YB sekolian sobab naik’an hargo minyak ari tu. Dah elok-elok naik banyak ari tu apo pulak diturun’an laie… biar yo lah hargo camtu, kalau buleh naik’an laie, laie baguih. Sobab bilo hargo minyak naik, hargo barang lain pun naik gak laa… banggo boto’ sey ghaso… cam duduk kek LAS VEGAS lak.
Sey janji ngan YB-YB sumo, yang sey akan ubah tebiat sey dari makan ikan kombong yang dah merah menyalo mato’eh tu dan yang dah pocah bedorai porot ikan tu pado ikan koring yor… sey sanggup bekorban untuk negaro.
Anak sey yang tujuh orang tu yang dah buleh buek team futsal tu buleh la bekojo lopeh sekolah, buek bantu omak ayah dia orang ni haaa… kok tak berkojo pun buleh gak la jadi mat rempit kat SENAWANG tu. Dapek gak la duit sesikit. Buleh gak la menoruskan tradisi keluargo sey ni yang tak pernah durhako pado negaro.
Ghaso-ghaso, sey nak ubah suai bilik-bilik yanga do kek ghumah sey… nak buek tompek bolo ikan ngan tanam sayor cagho hidroponik (apo binchek’eh nih) sey terpakso tanam kek dalam bilik sobab sey tingga’ kek rumah flet. Rebet yang YB bagi kek sey memang melampuh-lampuh lobeh’eh dari keporluan sey. Bilo sey congak-congak’an, sey cumo guno duit 20 sen yor duit minyak moto sehari… Ado la untung 21 sen… Bak kao SAIDA AF6 ‘okey la tu…’
Sey tak pakai pun keto sobab bilo minyak naik hargo, sey kono jual Datsun kotak mancis sey tu, dapek gak la duit skit. Tokeh-tokeh use car pun ado gak la untung’eh skit.
Team futsal sey tu, sey nak suruh eksesais hari-hari bejalan kaki tak pun naik beska’ yo gi sekolah… Bukan jauh pun 5 km yor.. Dokek yor tu… Walaupun gaji sey RM 1000… sbona’eh terlobih cukup untuk keluargo sey…
Buek permulo’an nak ngubah caro hidup sey… sey tak akan guno’an gulo bilo nak buek kupi, tak akan guno’an topong bilo nak buek kodok. Sey akan ganti’an bogheh ngan ubi… tiap hari sey ngan keluargo sey akan berposo (kecuali pado hari-hari yang dilarang berposo) sey akan buek minyak masak sendiri. Itu antaro caro sey ngubah caro hidup.
Ado banyak laie caro… semuo kerano kito. Dan sey mintak bona’ naik’an laie hargo tol sobab orang sebolah rumah sey ni orang pembangkang. Tuan punya Blog ni pun orang pembangkang… Dia orang ni slalu guna HIGHWAY, biar padan muko dio orang.. tu la suko bona’ nyokong pembangkang… PAKATAN RAKYAT konon… Padan muko ekau orang, bayar la tol banyak-banyak.
Nanti YB buleh la melawat sey dan sedokah kain pelikat solai bilo dah dokek-dokek pilihan rayo sok… Insya-Allah kain pelikat tu sey nak bubuh dalam frame dah tu gantung kek dinding rumah sey… tapi jangan lupo lak YB sain autogerap kek kain tu yor…
Jangan lupo YB, naik’an laie hargo minyak, jangan la diturun’an elaun mentori-mentori tuuu… sian dia orang, kang apo lak anak bini dio nak makan… tak dapek la pulak nak shopping kek Landen.
Akhir kato, sey totap nyokong YB-YB sekolian, sey takkan nyokong pembangkang… ntah apo-apo ntah. Jangan lupo YB lopeh ni naik’an pulak hargo tol banyak-banyak, biar orang sebolah rumah sey ni ngan Tuan punya blog ni yang suko sangat nyokong pembangkang u tojoley lidah’eh nak bayar…
Sekian Timo Kasih.

Pocah kaco, pocah goleh,
Dah baco, harap baleh.